រតនគិរី៖ ក្នុងរយៈពេល ៣ថ្ងៃ នាឱកាសពិធីបុណ្យភ្ជុំបិណ្ឌឆ្នាំនេះ ខេត្តរតនគិរីទទួលបានភ្ញៀវទេសចរជាង ២ម៉ឺននាក់ កើមឡើងជាង ១ភាគរយ បើធៀបនឹងពិធីបុណ្យភ្ជុំបិណ្ឌឆ្នាំ២០២២។

ប្រធានមន្ទីរទេសចរណ៍ខេត្តរតនគិរី លោក ង៉ែត ពិទូ បានឱ្យដឹងថា ចាប់ពីថ្ងៃទី១៣ ដល់ថ្ងៃទី១៥ ខែតុលា ឆ្នាំ២០២៣ ឱកាសបុណ្យភ្ជុំបិណ្ឌនេះ ភ្ញៀវទេសចរជាតិ-អន្តរជាតិ បានចូលមកទស្សនាកំសាន្តនៅ តាមតំបន់ទេសចរណ៍នៅក្នុងខេត្តរតគិរីមានចំនួនសរុប ១៨ ៣៦២នាក់។ ក្នុងនោះភ្ញៀវទេសចរជាតិ ចំនួន ១៨ ២៥៥នាក់ និងភ្ញៀវទេសចរអន្តរជាតិចំនួន ១០៧នាក់ ខណៈចំនួនភ្ញៀវទេសចរសរុបមានការកើនឡើង ១,១១%។

លោក ង៉ែត ពិទូ បានឱ្យដឹងទៀតថា ក្នុងនោះភ្ញៀវជាតិ មានការកើនឡើង ១,៣៣% ភ្ញៀវអន្តរជាតិធ្លាក់ចុះ ២៦,៧% បើប្រៀបធៀបទៅនឹងពិធីបុណ្យភ្ជុំបិណ្ឌ ឆ្នាំ២០២២ មានចំនួន ១៨ ១៦១នាក់។

ប្រធានមន្ទីរទេសចរណ៍ខេត្តរតគិរី បានអោយដឹងទៀតថា នៅរសៀលថ្ងៃទី១៤ ខែតុលា ឆ្នាំ២០២៣នេះ ថាការកើនឡើងភ្ញៀវទេសចរ ដើរកំសាន្តតាមរមណីយដ្ឋាននានា ក្នុងខេត្តឆ្នាំនេះ ដោយសារការយកចិត្តទុកដាក់ ពីរដ្ឋបាលខេត្តរតនគិរី ក្នុងការអភិវឌ្ឍន៍ហេដ្ឋារចនាសម្ព័ន្ធ ទីតាំងទេសចរណ៍នានាមានការររៀបចំសណ្តាប់ធ្នាប់ និងការការពារសន្តិសុខបានល្អពីអាជ្ញាធរខេត្ត ក៏ដូចជាអាជ្ញាធរតាមមូលដ្ឋានផងដែរ៕